Успешна француско-македонска вечер на ора и танци во Крива Паланка

Крива Паланка, 18 април 2026 — Фондацијата Бел Идеал, во соработка со Центарот за култура во Крива Паланка (Република Северна Македонија), оваа сабота организираше исклучителна вечер посветена на средбата и културната размена меѓу Франција и Северна Македонија.

Настанот, одржан во Центарот за култура во градот, го привлече вниманието на бројната публика која имаше можност да ужива во богата програма со традиционални ора и танци изведени од француски и македонски уметници.

Публиката имаше чест да пречека исклучителни гости: француската група „Amitiés et Danse“ од Sully-sur-Loire, составена од 11 танчери и предводена од претседателката на здружението и професорка по танц г-ѓа Ирина Леже—Горбачева (Irina Leger-Gorbatcheva).

Уметниците претставија неколку кореографски точки со традиционални француски танци, нудејќи жив и автентичен приказ на ова богато културно наследство.

Вечерта беше збогатена и со настапот на КУД „8 Октомври“ од Крива Паланка, составена од 20 играорци, предводени од кореографите г. Аце Златановски и г. Александар Петровски, кои ја воодушевија публиката со енергични изведби на македонски традиционални ора и фолклорни танци.

Оваа уметничка средба придонесе за истакнување на културните врски меѓу Франција и Северна Македонија во топла и пријателска атмосфера.

„Танцот е универзален јазик кој ги зближува народите и ни овозможува да ги споделиме нашите традиции. Многу сме среќни што успеавме да ја организираме оваа културна средба во Крива Паланка и на тој начин да придонесеме за зајакнување на пријателството меѓу Франција и Северна Македонија“, изјави г-ѓа Јадранка Бојковска Бенрејдал, претседателка на Фондацијата Бел Идеал.

Овој културен проект ќе продолжи на 20 април 2026 година во Скопје, во МКЦ – сала Фросина, каде што публиката во главниот град ќе има можност да ужива во нова изведба на овој француско-македонски танцов спектакл.

Фондацијата Бел Идеал им се заблагодарува на сите партнери, уметници и посетители кои придонесоа овој настан да биде вистински момент на културна размена и прослава на традициите.